John 6

Iesu na embo 5,000 unduna

(Matthew 14:13-21, Mark 6:30-44, Luke 9:10-17)

1Eto emita ambota Iesu na umo javo Galilee (amita javo nei Tiberias) avo embuto ovitiho ta pambuto mitie ari neite neite ue embo kokondekena 2avo kesi embomeni isapamane na ambo ambo ue puvuo 3Iesu na heti i ta amita ambotani ga bitito arumbena. 4Eto Iesu na ari erevi ena amo Judea ta jarukari pondo ari iji puvuto auvitinu ena. 5Eto Iesu na arerembeto embo isapamane puvutuhuo kito Philip ta degi ke einge ena, “Ungote indari nainge koro na ombuto umbuto embo isapamane emo unduroro?” ke ainge ena 6amo Iesu na do aisuja amo matu kina te teho Philip ta degi au Philip na ke do au ingesi avo eto ingina 7Eto Philip na ke mine einge ena, “Ungote koro peni vahai na bread umbaetera amo embo vahai vahai na pereto indoro inono mane aisuja.” Ainge enu. 8ambotani nei Simon Peter ta namei Andrew na einge ena, 9“Meni isapa emina bread 5 umo o heriso, ainge umbuto puvuto mitia te inono manera,” ainge enu 10Iesu na einge ena, “Aravora te evu embomeni tapa arumbare.” ainge enu embo tapa 5,000 te pamone te meni isasaraho te tapa enena ta arumbeo 11Iesu na bread tapa 5 umbuto God ta degi peketo embo arumbea amita degi ikena. Eto umo o heriso amite tapa ikenu embomeni tapa indio inono enu 12Amita ambotani ta degi einge ena, “Indari indera amita ihehe avo aija mane asova te tapa siriketo umbuvujo.” ainge enu, 13ihehe siriketo umbua bread amo tapa 5 rate hambija tapa 12 amo ihehe na pevitina. 14Eto Iesu na ari erevi enu embomeni na kito ke einge ea, “Peroveta enda ta puvuresuja ainge ijiore simba ere ovora amore erevira,” ainge ea. 15Eto embomeni na Iesu ta degi ke vasiri na eto aro enana ta king aja ke asora avo Iesu na kito umo eonga beto tiri ta pambuna.

Iesu na umo hamo ta isa ena.

(Matthew 14:22-33, Mark 6:45-52)

16Eto ture vovunu ambotani na da Capernaum umo ovitiho ai ta pambasi umo hora ta beto 17e nga ta bitia eto Iesu tiri ta pambuna amo puvurae enu mume sihukitunu 18e nga ta pahuo pisara peni vahai be puvuto umo piri unu 19e nga tavitie 6 o 7 kilometre ainge pahuo Iesu na umo hamo ta haito puvutuhunu kito oju uo 20Iesu na kito ke einge ena, “Namora, ungo oju avojo.” ainge enu 21Iesu e nga ta bitoja uje ea te degi pambasi uje ea avo matu puvua

Da Capernaum ta ke kasari bande ai ta Iesu ga ke mine ara ea.

22Eto embomeni asa umo ovitiho ta toa amina iho bujenu e nga vahai be avo mitina ai ta ambotani na pere bitito pahuo Iesu avo e nga ta bitae 23kito bread india degi amita engiti ta da javo Tiberias ai ta e nga nenei puvua avo Iesu te ambotani te puverete avo kesi pambua 24rate kiae eto e nga nei ai bitito Iesu jombure asi da Capernaum ta pambua.

Iesu amo Utu i ta indarira

25Eto pambuto Iesu tambuto ke einge ea, “Ate poekari embo, umo nainge eto puve?” ainge eo 26Iesu na ke mine einge ena, “Na ungota degi ke be erena, ungo God ta ari neite neite keva avo ae rate indari peni vahai be indeva avo eto na jombure ere ova. 27Te indari amo sari aisuja avo eto ungo indari ta pure avojo, indari nei vasiri te daroho iriuja amita pure avo evujo. Eto indari avo Embo ta Meni na hande ikasi ere ua, Eto God Mamo na Embo ta Meni javotoho ke eria,” ainge Iesu na enu 28Embomeni na ke einge ea, “Eto God na dago pure do ara uje ere oi?” ainge eo 29Iesu na ke mine einge ena, “God ta pure amo erevira: God na Embo iketei puvija avo ke be ijie tumota evujo,” ainge enu, 30mine einge ea, “God ta ke matu kajari ai ta ke einge mitia. ‘Amina bread Utu i ta ikenu embomeni na india,’ ke ainge kajari mitia amo dagota mamamane na ojagatambu ta mitie Utu i ta bread avo india te inena pure do ao no hajire avo kito ke be aro?” ainge eo, 32Iesu na ke einge ena, “Na ungota degi ke be erena, Utu i ta bread avo Moses na ikae rate nau Mama na Utu i ta bread be avo ikeuja 33Eto God ta bread be avo Utu ta eto beto embo tapa ta degi vasiri ikeuja,” ainge enu 34“Embo, bread avo dagota degi matuainge ikejo indore,” ainge eo, 35Iesu na ke einge ena, “Vasiri te irari bread amo namora. Eto embo amuna nau degi ta huresuja amo beuja mane kesuja. Eto na tumota aisuja embo na mane umo ujeje kesuja 36Eto na ungota degi matu ijiena te ungona na titi na ere kogova te na tumota ae ere ova. 37Te God na embo nau degi ta ikasuja amo nau degi ta hururoro na mane toasona te umbasona 38Eto na Utu ta eto puvena amo uje nau avo aisi puvuraera te na iketei puvena Embo amita uje avo pere aisona. 39Eto embo na iketei puvena amita uje amo embo tapa nau iketija amo nei vahai mane beto pambasuja te iji kombu te ano tapa erasora. 40Erena amo nau Mama ta uje amo embo amuna God ta Meni kito tumota eto vasiri daroho umbasuja amo iji kombu te ano vasiri te erasuja,” ke ainge Iesu na ijinu 41Judea embomeni na ‘Na bread Utu ta beari ra’ ke ainge Iesu na ena avo ingito isoro ke ungo eonga ijie 42einge ea, “Embo emita Mamo Joseph ra eto amita e mamo amo ungotena kiarira te doeto Utu ta eto beari ke erei?” ainge eo 43Iesu na ingito, “Ungo isoro ke ungo eonga ereva avo tovu.

44Eto embo na eonga nau degi ta mane huresuja te God na jigito gorukau huresuja embo amo na iji kombu te ano erasuja. 45Eto peroveta na ke einge kajea, ‘Embo tapa avo God na ate poekasuja’ ke ainge kajari mitia avoeto embo amuna God ta ke ingito kiari uhue nau degi ta puvuja. 46Rate embo na God ta tombu kiaera te Embo God ta degi eto puvurari amina God kiarira 47te na ke be erena embo amuna ke be ijie tumota aisuja amo vasiri daroho umbasuja. 48Eto na vasiri daroho ta bread ra, 49te ungota mamamane na ojagatambu ta mitie bread Utu ta eto beari avo india te irae ambuvujekea 50te bread Utu ta eto beari erena emo indito mane amburesora, 51te bread vasiri te Utu ta eto puvija ke erena amo namora eto embo amuna indesuja amo vasiri te daroho iresuja. Eto bread ikasona amo nau bisi avo enda ta embomeni vasiri te irora ikasona,” ke ainge Iesu na enu, 52Judea embomeni na tumo ue ke ungo eonga eto einge ea, “Do eto embo emita bisi ikau ungotenane indoro?” ainge eo, 53Iesu na ke mine einge ena, “Eto ungo ta degi ke be erena. Embo ta Meni ta bisi te sasaga te indae aisova amo ungota degi vasiri mane iresuja, 54te embo amuna nau bisi te sasaga te indesuja amo embo amita degi vasiri te daroho iresuja avoeto iji kombu ta jigono erasuja. 55Amo nau bisi te nau sasaga te amo indari be avoeto, 56embo amuna nau bisi te sasaga te indesuja amo na embo amita jo ta iresona eto embo amo jo nau ta iresuja 57Ke amo erevira, nau Mama vasiri te na na iketei puvuto amita degi vasiri ere uhona ainge nombo embo amuna na indito nau degi ta vasiri umbasuja. 58Eto bread Utu ta eto beari erena amo ungotenau mamamane na indito ambuvujekea ainge mane rate bread erevi indesuja amo vasiri te daroho iresuja.” 59Ke ainge da Capernaum kasari bande ta enu

Daroho irari ta ke amo Iesu ta degi mitia

60Ingito amita ambotani nei uhoho na einge ea, “Ke emo sapura be avo ere ingihera avoeto embo na naingeto ke erevi ambo ambo aro?” ainge 61tumo te tapa ea avo Iesu na kito ke einge ena, “Eto ungo ke erena avo ingito tini kambari ere ovete? 62Embo ta Meni na beari degi ta bivitirou ungo kito do hotembavo? 63Eto bisi na nei do mane ikeuja te Ahihi na vasiri ikeuja avoeto na ke erena amo ahihi te vasiri te amita ke avo erena. 64Rate ungo nei uhoho na ke be ae eova.” Ainge Iesu na ena amita be amo Iesu ke be ae embopo eto embo nei Iesu ta jenge indesuja embo amo Iesu na matu itikari ta kina. 65Eto ke nei einge ena. “Avoeto ungota degi ke matu ijiena amo embo na mane nau degi ta huresuja te God na au huresuja ainge ijiena.” 66Eto ke ainge ena amikote ambotani nei uhoho na Iesu ambo ambo ae toto ungota uje ta pambua. 67Eto Iesu na ambotani 12 ta degi ke einge eto ingina, “Eto ungote tapa pambasi uje ere ovete?” ainge enu 68Simon Peter na einge ena, “Bada dago umo toto amuta degi pambaro? Vasiri daroho irari ta ke avo inena hande oe 69ke be erera eto umo God ta Embo Otohu be avo dago ere kogora,” ainge enu 70Iesu na ke einge ena, “Nanena ungo 12 avo siriketo uhana te ungo vahai avo Satan ta tohora.” Ainge ena 71amo embo Simon Iscariot ta meni Judas amo ambotani 12 ra te Judas amina isoro embo ta harikasuja avo eto ena.